ഇത് ഖുറൈശികളെ അരിശം കൊള്ളിച്ചു ,അവര്‍ വാദിഅല്‍ മുഹസ്സ്വബില്‍ കിനാന ഗോത്രത്തിന്റെ പ്രദേശത്ത് ഒരു യോഗം വിളിച്ചുചേര്‍ത്തു. അതില്‍ ഹാശിം, മുത്വലിബ് ഗോത്രങ്ങള്‍ക്കെതിരെ ഉപരോധം ഏര്‍പ്പെടുത്താന്‍ കരാര്‍ ചെയ്തു. മുഹമ്മദിനെ ഇവര്‍ക്ക് വധിക്കാന്‍ വിട്ടുകൊടുക്കുന്നതുവരെ, അവരുമായി വിവാഹ, കച്ചവട, ഇടപാടുകള്‍ നടത്തുകയോ അവരുമായി സഹവസിക്കുകയോ സഹകരിക്കുകയോ അവരുടെ വീടുകളില്‍ പ്രവേശിക്കുകയോ ചെയ്യരുതെന്നും അവര്‍ തീരുമാനിച്ചു. ഇതൊരു പത്രികയായി എഴുതി കഅബയുടെയുള്ളില്‍ പതിക്കുകയും ചെയ്തു: "ഹാശിം ഗോത്രത്തോട് ഒരു വിധത്തിലും സന്ധി പാടില്ല. അവര്‍ മുഹമ്മദിനെ വധിക്കാന്‍ വിട്ടുതരുന്നതുവരെ അവരുടെ കാര്യത്തില്‍ ഒരു അനുകമ്പയും കാണിക്കരുത്.'' എന്നായിരുന്നു പത്രിക.ഈ പത്രിക എഴുതിയത് ബഗീളുബിന്‍ ആമിര്‍ ബിന്‍ ഹാശിം ആയിരുന്നു.( നബി(സ) അദ്ദേഹത്തിന്നെതിരില്‍ പ്രാര്‍ഥിച്ചതുകാരണം അദ്ദേഹത്തിന്‍റെ കൈ പിന്നീട് തളര്‍ന്നുപോയി).ഇതോടെ, ഹാശിം, മുത്വലിബ് കുടുംബം ഒന്നടങ്കം-അവരിലെ അവിശ്വാസികളടക്കം- അബൂ ലഹബ് ഒഴികെ, ശിഅ്ബ് അബൂത്വാലിബിലേക്ക് നീങ്ങുകയും അവിടെ താവളമടിക്കുകയും ചെയ്തു. ഇത് പ്രവാചകത്വത്തിന്റെ ഏഴാം വര്‍ഷം മുഹര്‍റം മാസത്തിന്‍റെ തുടക്കത്തിലായിരുന്നു.ഇതേ അവസരം തന്നെ നബി(സ്വ) തന്റെ അനുയായികളോട് അബ്സീനിയയിലേക്ക് വീണ്ടും പലായനം ചെയ്യാന്‍ കല്പിച്ചു.
